Ngā Pātai e Auau ana te Uia
He aha nei a Climate Connect Aotearoa?
Ko Climate Connect Aotearoa tētahi pokapū whakarite kaupapa e auaha ana mō te āhuarangi. Ko tāna he whakahaere i te whakawhitinga kia manawaroa te āhuarangi, kia iti hoki te tuku waro a Tāmaki Makaurau me Aotearoa.
He mea whakatū e Tātaki Auckland Unlimited i runga i te tautoko a Te Kaunihera o Tāmaki Makaurau, ā, ko tāna he whakakotahi i ngā momo whakahaere hei ārahi i te whakaritenga o ngā rongoā, e iti ake ai te whakaputanga haukino e hāngai ana ki ngā whakaaetanga i te ao, e urutau ai, e momoho ai hoki a Aotearoa i te huringa o te āhuarangi.
I ahu mai i hea te whakaaro kia whakatūria a Climate Connect Aotearoa?
I ahu mai te whakaaro kia whakatūria he pokapū whakarite kaupapa e auaha ana mō te āhuarangi i te wā e whakawhanaketia ana a Te Tāruke-ā-Tāwhiri.
He mea whakawhanake nā Te Kaunihera o Tāmaki Makaurau me ōna hoa patuhi, me ngā mana whenua, me ngā pakihi, me ngā tāngata whai mātauranga, me ngā pokapū o te kāwanatanga, me ngā hapori, ā, ko tā Te Tāruke-ā-Tāwhiri he whakatakoto i ngā take mātāmua me ngā wāhi mahi e tutuki ai i a Tāmaki Makaurau ana whāinga mō te taiao:
- Kia 50 ōrau te hekenga o tā Tāmaki Makaurau whakaputa haurehu hei kati i te mahana i mua i te tau 2030, kia tautika ngā whakaputanga haukino i mua i te tau 2050
- Kia urutau ki ngā pānga mai o te huringa o te āhuarangi mā te āki kia rite a Tāmaki Makaurau mō ngā panonitanga kua kitea i te wā nei e pā ana ki te ara mō ngā whakaputanga haukino.
E tutuki ai ēnei whāinga, e waru ngā mahi mātāmua kei a Te Tāruke-ā-Tāwhiri. Ko te tuawhā o ngā mahi mātāmua ko te arotahi ki te ōhanga, ā, ka whai wāhi ki tērā ko te whakatūnga o "tētahi pokapū whakarite kaupapa e auaha ana mō te āhuarangi e taea ai e ngā tangata o Tāmaki Makaurau te whakatakoto rongoā mō te āhuarangi ki te mākete."
Ko Tātaki Auckland Unlimited, ko tā Tāmaki Makaurau pokapū mō te ōhanga me te ahurea, kei te pupuri i te mana ki te whakatū i tētahi pokapū i runga i te tautoko a Te Kaunihera o Tāmaki makaurau, ka mutu, kua whai pūtea motuhake nā te Mahere Tauroa a Tāmaki Makaurau.
Ko wai kei te whakahaere i a Climate Connect Aotearoa?
E whakahaeretia ana a Climate Connect Aotearoa e tētahi tīma mātanga e ngākau nui ana, ā, e tautokona ana e tētahi tīma whānui ake i Tātaki Auckland Unlimited. Tūtaki mai ki tō mātou tīma i konei.
He mea hoahoa, he mea whakawhanake hoki a Climate Connect Aotearoa nā runga hoki i te tautoko puipuiaki a tētahi Rōpū Tohutohu, ko ōna mema, ko ētahi mātanga mō te toitū e whakapono katotia ana, e mōhio ana hoki puta noa i te kāwanatanga, i ngā mana whenua, i te ao pakihi, i te hunga whai mātauranga, i te hunga monihua-kore. Nā ā rātou tohutohu punenga me ō rātou māramatanga i tautuhi ai mātou i te tauira whakahaere, i whakaritea ai ngā wāhi kia arotahingia, i whakamāramatia ai hoki ngā mahi mō ngā marama 12 tuatahi o te rerenga o te whakahaere. Ka kitea he kōrero atu anō mō tō mātou Rōpū Tohutohu i konei.
Hei wāhanga mō ngā whakaritenga ā-mana hautū e haere tonu ana, ka whakakapihia te rōpū tohutohu ki tētahi Komiti Hautū.
Kei hea a Climate Connect Aotearoa e tū ana?
E rere nei ngā mahi a te tīma o Climate Connect Aotearoa i Tāmaki Makaurau, ā, he wāhi mahi ka hurihia i ōna wā hei wāhi mahi ngātahi, ka mutu, e rua ōna taunga matua - kei Futures Lab i GridAkl; he papa mō te auaha e tū nei i Wynyard Quarter; ā, kei te tari o Tātaki Auckland Unlimited, kei Victoria Street West.